10-10 PLATAFORMAREN MANIFESTUA

Osasun Mentalaren Munduko Egunean, beste behin ere giza eskubideak aldarrikatu nahi ditugu sufrimendu emozionala edo psikosoziala duten pertsona guztientzat.

Egun honetan, gainera, deitu nahi dugu komunitate-kontzientzia (ber)eraikitzera, baita osasunari dagokionez ere, uste baitugu ez dagoela osasun indibidualik osasun kolektiborik gabe. Pertsona eta erakunde desberdinak gara, eta aniztasun sakon horretan oinarriturik, jabetzen gara bat eginda indartsuagoak garela, eta indar hori inoiz baino beharrezkoagoa dela estigmari amaiera emateko eta pertsonen garapen osorako.

Sufrimendu psikosoziala dugun pertsonok geure burua gaizki ikusteko joera dugu, baita harreman sozialak mugatzeko joera ere. Hori beste arrazoi bat da komunitate-sena berreskuratzeko.

Horretarako, harreman hurbilagoak, gizatiarragoak eta horizontalagoak eratzen saia gaitezke gure bizitzako hainbat esparrutan; besteak beste, asoziazionismoa sektore guztietan sustatuz, osasun mentalaren eremu espezifikoetatik harago, eta pertsonen sozializazioa bultzatuz hainbat jardueraren bidez: lan arlokoak, aisialdikoak, etab.

Gainera, gaurko eguna inflexio-puntu baten hasiera izatea gustatuko litzaiguke, behar ditugun aldaketen garrantzia aitortuko duena. Horretarako funtsezkoa da pertsona guztiok gure eskubideez eta betebeharrez informatu ahal izatea, irizpideak izan ditzagun gure egoera ulertzeko eta gure ahalduntze prozesuan aurrera egin ahal izateko. Horrenbestez, oso garrantzitsua da egiazko informazioa, eskuragarria eta loteslea jaso ahal izatea, interesa eta jakin-mina piztuko duen informazioa, nahasmendua eta desinformazioa saihestuz.

Horregatik guztiagatik, Osasun Mentalaren Egun honetan hau eskatzen dugu:

• Indibidualismoan, isolamenduan, lehiakortasunean eta kapazitismoan oinarritutako narratibek, begiradek eta politika menderatzaileek osasunean dituzten ondorioei buruz hausnartzea. Komunitatea ez da osagai indibidualen batuketa hutsa, harreman sare bat baizik, eta sare hori osasuntsu egituratuz gero, berebiziko garrantzia har dezake pertsonen bizitzei eusteko.
• Era berean, eta zenbait ikuspegi instituzionalek horrela ulertzen duten arren, komunitatea ezin da ulertu soilik elkarteen arloko eragile sorta gisa (zerbitzu publikoek asebetetzen ez dituzten behar eta gabeziak prekarietatetik arintzen saiatzen diren elkarteak, hain zuzen).
  Nolanahi ere, beharrezkoa da baliabideak handitzea, baliabide horiek aukera eman dezaten osasun mentalaren eremuko elkarteen sarea indartzeko Nafarroako Foru Komunitatean. Elkarteok pertsonen bizitzei eusten saiatzen gara, eta elkarte moduan huts egiten badugu, laguntzen ditugun pertsonen bizi- kalitatea ere hondatuko da.
• Osasun mentaleko erabiltzaileei eta horien ingurukoei informazio hobea ematea beren eskubide, betebehar eta aukerei buruz (baliabideei buruzko informazioa ahaztu gabe), bai eta jakinaraztea maila instituzionalean zer egin daitekeen eta zer ez, ezintasuna edo desgaitasunaren aitorpena nola eskatu behar den (aitorpenek eragiten ahal dituzten ondorioak barne) edo nola berrikusi diagnostiko bat, zer laguntza espezifiko dauden eta abar.

"Osasun mentala, konpromiso soziala"